Mesud Jakupi, i lindur më 20 prill 1984 në Studeniçan, Shkup, Republika e Maqedonisë së Veriut, është një inxhinier i diplomuar në fushën e informatikës dhe një profesionist me përvojë në administratën publike dhe menaxhimin e sistemeve. Arsimin fillor e ka përfunduar në vendlindje, në shkollën fillore “Naim Frashëri,” ndërsa arsimin e mesëm e ka kryer në Kuvajt. Në vitin 2012, diplomoi në Fakultetin e Shkencave Natyrore pranë Universitetit Shtetëror të Tetovës.

Që nga korriku i vitit 2024, Mesudi ushtron detyrën e drejtorit në Agjencinë e Rezervave të Mallrave në Republikën e Maqedonisë së Veriut. Më parë, në vitin 2022, ka shërbyer si drejtor në Elektranat e Maqedonisë së Veriut, sektorin për furnizim me ngrohje (“ESM Furnizim me Nxehje”).

Karriera e tij filloi në vendlindje si mësimdhënës në shkollën fillore “Naim Frashëri,” ku ka dhënë mësim deri në vitin 2018. Në shtator të atij viti, vazhdoi punën si administrator i sistemit në SHA ESM, duke kontribuar në zhvillimin e sistemeve teknologjike dhe informatike.

Përveç angazhimeve profesionale, Mesudi ka qenë aktiv në aktivitete kulturore dhe shoqërore, duke marrë pjesë dhe udhëhequr iniciativa në nivel lokal dhe në organe partiake.

Ai zotëron aftësi të shkëlqyera gjuhësore, duke folur rrjedhshëm shqipen (gjuhë amtare), maqedonishten, arabishten dhe anglishten.